هو إيه حكاية حوض هيرودوت اللي في البحر المتوسط دا.. وايه علاقته بثروات الغاز المصرية وليه دول كتير يتنافس عليه وازاي الكنز ده ممكن يغير مستقبل الطاقة في مصر.. خليكم معانا للآخر وهتعرفوا التفاصيل بعد الفاصل 
 

القصة ومافيها إن فيه 4 دول دلوقتي بتتنافس على مساحة كبيرة من البحر المتوسط اسمها حوض هيرودوت ودي منطقة شاسعة جدا و غنية جدا بالغاز الطبيعي حسب التوقعات وعشان تعرف قد ايه حجم مساحة المنطقة كبير  فحوض هيرودوت بيمتد على مساحة 113 ألف كيلومتر مربع أسفل المياه الاقتصادية الخالصة لكل من مصر، وليبيا، وقبرص، واليونان، وطبعا كل الدول دي ناوية تنقب على البترول والغاز والغاز في الجزء الواقع بمياهها الاقتصادية ومصر من اكتر الدول اللي قررت تنقب عشان أزمة الوقود الأخيرة وعشان كمان تحمي ثرواتها.

طيب قي الأول خلونا نعرف احتياطيات حوض هيرودوت كام من الغاز الطبيعي.. شوف حضرتك احتياطيات حوض هيرودوت من كميات الغاز غير المكتشفة قدرتها الشركات المتخصصة بحوالي 122 تريليون قدم مكعبة ودا لأن هيرودوت بيعتبر أكبر الأحواض في منطقة البحر المتوسط وأهمها من الناحية الجيولوجية، بسبب ما يحتويه من احتياطيات ضخمة محتملة، وهتغير شكل الطاقة في المنطقة والعالم.
وحسب  دليل حقول النفط والغاز اللي نشرته منصة الطاقة المتخصصة، منطقة هيرودوت بتوقع في قلب منطقة غنية بالمواد البترولية وعلى حدود المنطقة حوض ليفانت الغني بالنفط والغاز، ومن الجنوب الشرقي حوض دلتا النيل واللي بدأت تظهر فيه اكتشافات مبشرة.. وحسب المنصة الامريكية  مصر هتكون أول دولة تبدأ خطوة التنقيب في هذا الحوض، من بين دول ليبيا وقبرص واليونان.

وعشان نعرف قد ايه في حالة تشابك وصراع على ثروات منطقة هيرودوت كفاية نقولك إن منطقة شرق المتوسط بتضم حوض ليفانت، اللي بيمتد على مساحة 83 ألف كيلومتر مربع، ويبدأ من شمال مصر على طول الساحل الشرقي للبحر المتوسط، مرورًا بسواحل فلسطين، ولبنان، وسوريا، وقبرص، لغاية ما يوصل تركيا.. كمان المنطقة بتضم حوض دلتا النيل، واللي بيمتد القسم الأكبر منه أسفل المياه المصرية، على مساحة شاسعة تبلغ نحو 250 ألف كيلومتر مربع.

عايز تعرف سبب الصراع بين الدول دي.. هنقولك عشان هيئة المسح الجيولوجي الأميركية توقعت إن متوسط حجم مصادر النفط والغاز غير المكتشفة والقابلة للاستخراج تقنيا في حوض ليفانت بتوصل 1.7 مليار برميل من النفط، و122 تريليون قدم مكعّبة من الغاز، بالإضافة إلى 3 مليار برميل من سوائل الغاز الطبيعي.

وفي حوض دلتا النيل بلغ متوسط تقديرات الهيئة الأميركية نحو 1.76 مليار برميل من النفط، و 223.2 تريليون قدم مكعبة من الغاز، يعني ضعف الاحتياطيات المتوقعة في حوض ليفانت..بالإضافة إلى 5.974 مليار برميل من سوائل الغاز الطبيعي.. حضرتك متخيل الأرقام قد ايه في المنطقة اللي في حدود مصر وممكن تعمل ايه في ملف الطاقة بالشرق الأوسط والعالم.

طبعا زي ما احنا عارفين مصر بتجري جري في ملف التنقيب عن البترول والغاز وشفنا حجم المزايدات اللي طرحتها للتنقيب ومنها مزايدة التنقيب عن النفط والغاز في المربع 1 شمال فوكا، اللي ييقع في حوض هيرودوت الغني بالاحتياطيات البترولية.

ومن بين  مساعي التطوير المستمرة، وقع تحالف دولي بقيادة شركة توتال إنرجي الفرنسية والشركة المصرية القابضة للغازات الطبيعية (إيجاس)، في يناير 2021، اتفاقية استكشاف وإنتاج لمنطقة شمال رأس كنايس البحرية الواقعة في حوض هيرودوت قبالة سواحل مصر في البحر المتوسط... وفي مارس 2021، أعلنت شركة شل البريطانية توقيع اتفاقيتين جديدتين للتنقيب عن النفط والغاز مع وزارة البترول والثروة المعدنية، في المياه العميقة بحوض هيرودوت، قبالة الساحل الغربي لمصر على البحر المتوسط..