معاك فلوس زيادة ومدخرات وبتفكر تعمل إيه فيها .. بننصحك ما تتصرفش قبل يوم الخميس اللي جاي وقبل ماتشوف التقرير دا للاخر.. خليكم معانا
يوم الخميس الجاي لجنة السياسة النقدية بالبنك المركزي هتعقد اجتماعها السادس عشان تشوف مصير سعر الفايدة على السحب والايداع والاقتراض وزي ما احنا عارفين إن اللجنة سبق وثبتت سعر الفايدة في أخر اجتماعين ليها عند مستوى 27.25%، 28.25% و27.75%، على عائد الإيداع والإقراض لليلة واحدة وسعر العملية الرئيسية للبنك المركزي على الترتيب.
ورغم إن أغلب التوقعات رايحة في سكة تثبيت سعر الفايدة لكن يفضل احتمال خفض سعرها وارد ودا مرهون بحجم التدفقات الدولارية لسوق الصرف ونسب التضخم.
المهم لو المركزي عملها وخفض سعر الفايدة أو حتى ثبتها وإنت بتفكر تستثمر فلوسك في حاجة تجيبلك مكسب أكبر هنا هيكون عندك أكتر من خيار للاستثمار لكن الأفضل فيهم واللي بيرشحه خبراء الاقتصاد هو الاستثمار في الدهب ودا لأن سوقه طالع وكل التوقعات بتقول إن اسعار المعدن الأصفر مستمرة في الصعود لمستويات قياسية محليا وعالميا ودا لأسباب كتير سبق وشرحناها هنا في بانكير وقلنا إنه فيه حالة طلب شديدة على الدهب عالميا من البنوك المركزية الكبيرة بسبب مخاوف اتجاه بنك الاحتياطي الفدرالي الأمريكي أو المركزي الامريكي لخفض سعر الفايدة في اجتماعه اللي جاي.
طبعا أي خفض لسعر الفايدة معناه على طول ارتفاع أسعار الدهب عالميا بسبب زيادة الطلب لتعويض خسائر احتياطيات البنوك المركزية المقومة بالدولار وكمان استمرار الصراعات العالمية خلي فيه توتر شديد في اسواق الدهب العالمية بسبب اللجوء إليه كملاذ آمن ودا غير أسباب تانية كتير منها ارتفاع تكلفة التنقيب على المعدن الاصفر وندرة الاكتشافات الكبري.
كل دا بيقول إن سوق الدهب هو الملاذ الافضل حاليا لأي استثمارات مع توقعات ارتفاع الاسعار محليا وعالميا بشكل كبير وكفاية تعرف إن اقرب توقعات بتقول إن سعر الاونصة أو الاوقية هيوصل 3 الاف دولار في نهاية السنة دي او أوائل السنة الجاية والارتفاع هيستمر لغاية 2026 وعشان كده لو مع حضرتك سيولة زيادة وحبيت تستثمرها صح في حاجة تجيبلك فلوس يبقي تطلع دلوقتي على الصاغة وتشتري سبايك وجنيهات دهب لأنها أكتر أنواع من المعدن النفيس بتتباع من غير ما التاجر يقولك دهب مستعمل زي المشغولات الدهبية.
الاستثمار في الدهب ليه أكتر من ميزة غير إنه مربح ومنها إنه سهل حمله وتخزينه في أي مكان آمن ومش بيحتاج جهد وتحركات ولا أوراق ولا متابعة زي لو هستتمثر في مشروع مثلا أو عقار أو حتى في البورصة واللي هتفضل تتابع فيها حركة الاسهم على مدار اليوم وغير عامل المخاطرة الكبير على عكس الدهب اللي مكسبه مضون مليون في المية.
0 تعليق