أزمة نواقص الأدوية لسه مكملة معانا وشاغلة بال الحكومة، وحاليا الدولة كلها بتحاول تحط حدود للأزمة علشان المرضي يلحقوا ياخذوا الأدوية اللي محتاجنيها.. يا تري الدولة بتعمل اية علشان تحل أزمة نواقص الأدوية.. والأزمة هتخلص امتي.
سوق الأدوية في مصر بيعاني في الوقت الحالي من نقص شديد في أنواع كتيرة من الأدوية خصوصا المرضي من أصحاب الأمراض المزمنة، وللاسف الدولة علي مدار الشهور اللي فاتت فشلت في وضع حدود للأزمة ووصلت اسعار الأدوية لأرقام كبيرة وخرجت عن السيطرة، وحاليا في أنواع كتيرة من الأدوية اللي المرضي محتاجينها مش موجودة في السوق وبقت أزمة حقيقة بتهدد الوضع الصحي بشكل كامل في مصر.
طيب الحكومة بتعمل اية علشان تحل أزمة نواقص الأدوية ؟.
الحكومة جددت تعهدها بحل أزمة نقص الأدوية خصوصا بعد الشكاوى الكتيرة من نقص أنواع مهمة لأصحاب الأمراض المزمنة، وعلشان كده الدولة بتسعي بكل قوة لتسريع وتيرة الإفراج الجمركي وتيسير الإجراءات ومنح الأولوية للأدوية ومستلزمات الإنتاج .
الدكتور مصطفى مدبولي رئيس مجلس الوزراء عمل اجتماع مع رئيس هيئة الدواء لمتابعة تطورات ملف توفير الأدوية في السوق المصرية، وأكدت أن الحكومة بتبذل كل الجهود الممكنة لإتاحة الأدوية وتيسير الإفراج الجمركي عنها والإفراج عن المواد الخام اللازمة لعملية التصنيع وتلبية احتياجات السوق من الأدوية.
على الغمراوي، رئيس هيئة الدواء، قال أن الهيئة بتبذل كل جهدها لإتاحة الدواء في السوق المصري، و أن الهيئة نجحت بالفعل في زيادة المعروض من الدواء وهيتم توفير بعض الأصناف المتبقية التانية من الأدوية في غضون الأسابيع القليلة اللي جاية.

طيب مشكلة نواقص الادوية دي هتنتهي أمتي ؟.
رئيس شعبة الأدوية باتحاد الغرف التجارية المصرية علي عوف، قال إن أزمة نقص الأدوية اللي بتعاني منها مصر من شهور طويلة هتنتهي بشكل شبه كامل في فترة هتتراوح من شهر ونصف لشهرين على أقصى تقدير.

رئيس شعبة الأدوية باتحاد الغرف التجارية المصرية قال أن شركات الأدوية العاملة في مصر وفرت 200 مستحضر دوائي، وحاليا الشعبة بتستعد لإتاحة 200 مستحضر جديد في خلال أسبوعين، وأكد أنه في انفراجة هتحصل في أزمة نواقص الدواء في مصر، بس هتحتاج شوية وقت علشان المواطن يبدأ يحس بحل الأزمة خصوصا أن مصر فيها ما يقرب من 80 ألف صيدلية، ومش ممكن أزمة نقص الأدوية تتحل دفعة واحدة .
عوف اتكلم وقال أن خوف الناس من نقص الأدوية تسبب في انتشار ظاهرة تخزين الدواء، وحصل ارتفاع كبير في استهلاك الأدوية بنسبة أعلى من إنتاج الشركات والتصرفات دي خلت الأزمة تطول معانا لحد دلوقتي ولسه مستمرة معانا ، ولكن قريب قوي هتكون في حلول للازمة بشكل كامل .
عوف قال كمان أن  عدد الأدوية الناقصة في مصر بيوصل لـ 1000 مستحضر بما يعادل 6% من إجمالي الأدوية المتداولة في السوق واللي بيوصل أجمالي عددها لـ17 ألف صنف.