إيه هي قصة الدعم النقدي اللي هتقدمه الحكومة للمواطنين، وهيكون كام، ومين الفئات المستحقة للدعم ده وعددهم كام، وامته هيتطبق.. هنقولك كل التفاصيل في التقريرده، قتابعنا للآخر. 
 

في الساعات الأخيرة، الدكتور مصطفى مدبولي رئيس الوزراء، اتكلم عن إن في خطة للحكومة للتحول لـ الدعم النقدي بدلا من العيني، وده عشان كل مواطن يحصل على حقه في الدعم اللي يتقدمه الدولة له.

طب يا ترى إيه هو الدعم العيني والدعم النقدي؟

بص يا سيدي، الدعم العيني ده عبارة عن خدمات بتقدمهالك الدولة بشكل مجاني أو بنسبة تخفيضات عالية، زي مثلا التموين ده دعم عيني، وقريب جدا الحكومة هتحوله لدعم نقدي يعني حضرتك ممكن تاخد فلوس بدل السلع التموينية اللي انت بتاخدها كل شهر.

وفكرة تحويل الدعم العيني لنقدي الحكومة بتسعى لها من فترة كبيرة، و الدكتور فخري الفقي، رئيس لجنة الخطة والموازنة بمجلس النواب، اتكلم عنها، وقال إن موازنة العام الحالي بتتضمن دعم الخبز بحوالي 98 مليار جنيه، وأكد كمان إن خطة التحول للدعم النقدي بيناقشها الحوار الوطني دلوقتي، وبالفعل لو اتطبقت، فالأسرة المكونة من 4 أفراد هتحصل على 800 جنيه شهريا في حالة التحول للدعم النقدي، يعني 200 جنيه للفرد، لكن هيتم مناقشة موقف التحول للدعم النقدي وتأثيره على رفع معدل التضخم وارتفاع الأسعار، ولو ثبتت فعاليتها هيتم تطبيقها قريب جدا.

وكان رئيس مجلس الوزراء، اتكلم قيل كده عن موضوع الدعم النقدي، وقال إنه أحال الموضوع ده لمجلس أمناء الحوار الوطني، وهم بالفعل عقدوا أكتر من جلسة عشان يناقشوه.

طب هل في موعد لتطبيق الدعم النقدي؟

لحد دلوقتي مافيش، بس الحكومة قالت إنها ممكن تبدأ تطبق أول مرحلة له في السنة المالية الجاية، وده بشرط إنه لو حصل توافق مجتمعي عليه.

وواضح جدا من تصريحات الحكومة، أنها بتحاوب مواكبة العالم، لأن الدعم العيني بقى أسلوب قديم في أغلب دول العالم، فاغلب الدول دلوقتي بتدعم مواطنيها بفلوس عشان كده الحكمة فكرت في إعادة هيكلة الدعم عشان يوصل للي يستحقه.

وطبعا كلنا عارفين، إن الدعم النقدي لازم يتقدم للأسر الأكثر احتياجاً بدلاً عشان تقدر تشتري السلع والمنتجات من السوق الحر براحتها، كمان الدعم العيني بترتفع فيه نسب الفساد أكثر من النقدي اللي كله بيحصل فيه على حقوقه.

ومن ضمن خطة الحكومة دلوقتي، زيادة مخصصات الدعم والمزايا الاجتماعية إلى 635.9 مليون جنيه، وصرف دعم نقدى شهريا لـ22 مليون مصرى ضمن تكافل وكرامة، وإتاحة الخبز المدعم لـ 71 مليون مواطن على بطاقات التموين.

وده طبعا، لأن الدولة من سنة 2014 حريصة على علاج القضايا اللي بتمس حياة المواطنين اليومية، وفي مقدمتها توفير الخبز والسلع الأساسية للمواطنين ، وعشان كده وصل الحد الأدنى للأجور في القطاعين العام والخاص إلى 6000 جنيه شهريا.

كمان، البطالة وصلت عند أدنى مستوياتها بنسبة %6.7% في الربع الأول من عام 2024، وده كله لأن  الدولة شغالة دلوقتي على توفير كافة أشكال الدعم والحماية الاجتماعية المختلفة للمواطنين.