لو بتفكر تشتري أو تبيع دهب يبقي تشوف الفيديو دا للأخر.. وتعرف السوق رايح على فين وإيه الاحداث اللي هتحدد مصير المعدن الأصفر الفترة الجاية.. تابعنا للأخر..
 

النهاردة الدهب طالع نازل في مصر وعيار 21 بيتحرك في مستوى 3440 جنيها للجرام ودا مش المهم لكن الأهم في اللي جاي في سوق الدهب وتحديدا بعد أسبوعين وهو معاد انعقاد مجلس الاحتياطي الفدرالي الامريكي او البنك المركزي الأمريكي لبحث اسعار الفايدة على الدولار والتوقعات رايحة في سكة خفض الفايدة ودا معناه مباشرة سبب جديد بينضم لأسباب تانية كلها بتأدي لصعود أسعار الدهب عالميا.
يعني أي خفض للفايدة الامريكية معناه قفزات جديدة في سعر المعدن الأصفر .. هتقولي ليه؟.. هقول لحضرتك لأن تخفيض الفايدة معناها ارباح أقل لاصحاب الودايع وخسارة للبنوك المركزية العالمية واللي بتعتمد في أغلب احتياطياتها على الدولار الأمريكي وبتضطر ساعتها تعوض خسارتها بشراء كميات كبيرة من الدهب ودا اللي بيحصل دلوقتي فعلا وهي إن فيه أكتر من 15 بنك مركزي عالمي أعلنوا نيتهم شراء كميات كبيرة من الدهب في الفترة الجاية ودا معناه زيادة مؤكده في الأسعار.
كمان تقدر تزيد أسباب تانية لارتفاع اسعار المعدن الاصفر وهي التوترات الجيوسياسية في العالم وفي ممرات التجارة الدولية واللي بتسبب فوضى وخوف في الاسواق ودا بيزيد الطلب على الدهب كملاذ آمن.. الخوف بقي اللي حذرت منه مؤسسات مالية دولية هي إن الدهب هيوصل لمستويات قياسية هتعدي الـ3000 دولار للأوقية على بداية سنة 2025 من 2500 دولار تقريبا دلوقتي ودا بسبب اجتماع عوامل كتير لأول مرة مع بعضها كلها بتساعد على اشتعال سوق الدهب زي ماقلنا.
طيب ايه الوضع في الصاغة المصرية؟
مصر زي أي سوق في الدنيا بتتأثر بالاسعار العالمية لأن الدهب قبل مايكون معدن فهو نقد ويعتبر فلوس بالنسبة للبنوك المركزية وأي زيادة أو هبوط فيه الاسواق العالمية كلها بتتأثر ولما الدهب بيزيد في العالم أكيد هيزيد في مصر لأن السوق معتمد على الاستيراد وسعر الدولار وغير العرض والطلب وتقدر تتخيل لما سعر الدهب يوصل 3 الاف دولار سعره في مصر هيبقي كام..
عشان كل اللي فات بننصحك إن افضل وقت للاستثمار في الدهب هو دلوقتي وتشتري على قد ما تقدر من غير تأخير وتستنى عليه لما يوصل الذروة وتبيعه واللي غالبا هتكون في بدايات 2026 والنصيحة إنك تشتري سبايك وجنيهات دهب أفضل من المشغولات الدهبية واللي بتتعامل معاملة الدهب المستعمل على عكس السبايك والجنيهات.. وأكيد طبيعي لو معاك دهب ماينفعش تبيعه دلوقتي لأن لسه فيه زيادات تانية في الاسعار وكل ما تصبر كل ما كان مكسبك أكبر.