بعد التراجع الكبير لسعر الدولار أمام الجنيه على مدار الأسبوع اللي فات.. ياترى الدولار رايح على فين الأسبوع دا وهل هيكون فيه ارتفاع جديد ولا هيستمر في الهبوط وايه هي المفاجأة الجاية في سوق الصرف.. تابعونا للآخر وهتعرفوا التفاصيل في الفيديو ده ..
شفنا طبعا ازاي الدولار فضل ينزل على مدار الأسبوع اللي فات في البنوك ووصل لمستوى 48.57 جنيه من 48.85 جنيه في الاسبوع اللي قبله والحقيقة كان فيه تفسيرات كتير بخصوص الانخفاض المستمر في سعر العملة الأمريكية في الأيام اللي فاتت ومنها إن سوق الصرف بيشهد حالة من الاستقرار المستمر وعدم وجود مفاجآت صعبة أو قرارات مفاجئة وبالعكس كل المؤشرات الاقتصادية والمالية في تحسن مستمر ودا غير شهادات الثقة والاشادة الدولية بالاقتصاد المصري.
طيب الدولار رايح على فين الأسبوع دا؟
زي ماقلنا قبل كده محدش يقدر يتوقع سعر الدولار بكرة هيكون بكام على وجه التحديد ولو حد قالك كده قوله كلامك مش مظبوط لأن سعر الدولار والعملات دلوقتي بتتحدد بناء على قواعد السوق الحر والعرض والطلب وغير كده متقدرش تقول سعر معين لاي عملة غير لما تشوفها في التداول لكن في نفس الوقت فيه مؤشرات وارقام وبيانات بترسم في النهاية احتمالات لسعر العملة منها مثلاً زيادة التدفقات الدولارية واستمرارها ودا بيحصل دلوقتي وحسب بيانات البنك المركزي تحويلات المصريين بالخارج مثلا بتزيد كل يوم وكمان الإيرادات السياحية عاملة ارقام كبيرة وغير التدفق الاستثماري الكبير على السوق المصري واللي بدوره هيضخ دولارات كتير في سوق الصرف والبنوك وكل يوم نسمع عن صفقات ومشروعات جديدة في كل القطاعات.
كمان إستمرار الدولة في خطط توطين الصناعة ومنها صناعات حيوية جدا وكانت بتستنزف أموال ضخمة بالعملة الصعبة زي صناعة السيارات واللي مصر خلال ال 3 سنين اللي جايين هتكون حطت رجلها في الصناعة الهامة دي ودا غير صناعات تانية في كل المجالات ومنها لأول مرة صناعة متكاملة لتصنيع أشباه الموصلات والرقائق الإلكترونية وغير مشروعات التصنيع الغذائي والأدوات المنزلية والكهربائية وكل دا هيرفع من فاتورة التصدير وفي نفس الوقت هيوفر دولار الاستيراد..
من بين الأسباب اللي بتتوقع سعر الدولار في الأيام الجاية هو قرب اعلان تصنيف مصر الائتماني واللي متوقع أن وكالات التصنيف العالمية هترفعه بالايجاب نتيجة تحسن المؤشرات الاقتصادية بشكل عام والتصنيف دا مهم جدا لجذب الأموال الساخنة والغير المباشرة في السوق المصري ودا معناه تدفقات دولارية جديدة وكمان تصريحات صندوق النقد الدولي الأخيرة بتقول إن الاقتصاد المصري دخل مرحلة الاستقرار الكبير وحصل اصلاح هيكلي كبير في كل قطاعاته.
و من المؤشرات اللي بتدلل على مستقبل سعر الدولار كمان زيادة الاحتياطيات النقدية في البنك المركزي وتوافر السيولة الدولارية في البنوك وتلبية كل المتطلبات من العملة للمستوردين والشركات العالمية في مصر ونجاح المركزي في سداد جزء كبير من ديون 2024 ودا كله بيخفف العبء على حصيلة الدولار الموجودة.
الخلاصة أن كل المؤشرات بتقول إن الدولار رايح لمربع الاستقرار والانخفاض كمان في الأيام الجاية ودا كله قوة للجنيه المصري ومعناه استقرار وانخفاض لأسعار السلع ولوازم الإنتاج.
0 تعليق