يا تري ليه رئيس الوزراء الدكتور مصطفى مدبولي قال إن السنة الجاية 2025 هتبقى سنة الحسم، هل يقصد الحسم بخصوص تعافي الاقتصاد المصري، ولا يقصد استثمارات وصفقات جديدة من العيار التقيل هيتم حسمها قريب.. هنقولك كل التفاصيل في الفيديو ده. 
 

الدكتور مصطفى مدبولي زف بشاير ومفاجآت سارة وجديدة للمصريين خلال اجتماع مجلس الوزراء الأخير واللي انعقد في العلمين، وقال إن صندوق النقد الدولي أشاد بالاقتصاد المصري، ودور السياسة النقدية للحكومة في ترشيد الإنفاق وضبط الاستثمارات في الفترة الأخيرة، وده معناه اننا ماشيين على الطريق الصحيح، وإن الاقتصاد في طريقه للتعافي، وبالتالي الأسعار هتتظبط.

وكمان رئيس الوزراء، حسم موضوع التحكم في سعر الدولار، وقال إن تحديد سعر الصرف بيتم وفقًا لآليات العرض والطلب، من غير أي تدخل خارجي، يعني يقصد صندوق النقد مالوش دعوة بسعر الدولار.

ومن ضمن المفاجآت السعيدة اللي قالها مدبولي، إن الأوضاع الاقتصادية في مصر مستقرة، وإن الحكومة حطت مجموعة سيناريوهات للمرحلة الجاية عشان تقدر تتعامل مع أي مفاجآت أو صدمات محتملة للاقتصاد المصري، وده معناه أنها هتقدر تسيطر على ارتفاع سعر الدولار وكمان التضخم أو ارتفاع الأسعار

وكل ده معناه إن السنة المالية الجديدة 2024/2025 هتكون سنة الحسم لتعافي الاقتصاد المصري،  وهو ده اللي أشار ليه رئيس الوزراء.

كل ده كلام جميل وبيترجم حرفيا على أرض الواقع، والدليل على كده إن في مشروعات كبيرة واستثمارات كتيرة داخله البلد، زي مشروع إنشاء منطقة لوجستية وتجارية بمحافظة الدقهلية على مساحة 52 فدان، والمشروع ده استثماراته وصلت ل 4 مليار جنيه.

المشروع ده هيوفر 20 ألف فرصة عمل مباشرة وغير مباشرة، عشان كده وزير التموين الدكتور شريف فاروق، بيتابعه بنفسه.

والمشروع الضخم ده هدفع تعزيز التجارة الداخلية وتوفير فرص عمل جديدة، وكمان بيعتبر خطوة مهمة جدا لتطوير منظومة التجارة الداخلية في مص، وكل ده هيساهم في تعزيز الاقتصاد الوطني.

ضيف على كده، شركة "بلاك آند ديكر" الأمريكية اللي بتخطط لتدشين أول مصانعها الخارجية في مصر، وهيكون مخصص لإنتاج المعدات والأدوات الكهربائية فى منطقة الشرق الأوسط وإفريقيا، عشان يلبي احتياجات السوق المحلية وتعزز دور مصر كمركز تصديرى فى المنطقة، والمشروع ده هيساهم في تحقيق النمو الاقتصادي.

كل الكلام ده إيجابي، وبيؤكد إن الدولة المصرية بتستهدف الفترة دي تفعيل دور القطاع الخاص داخل منظومة الاقتصاد القومي، وأن الحكومة حريصة على تقديم من التيسيرات للمستثمرين عشان تحقق نهضة للاقتصاد ككل، وبيؤكد كمان أن سنة 2025 شايلة الخير للاقتصاد المصري واللي هنشوفه بعنينا قريب جدا.