يا ترى ايه الطلب العاجل اللي مصر طلبته من تجمع بريكس؟ وايه الاجتماع المهم اللى هيعقد الشهر الجاى وهيكون ليه دور كبير ومؤثر فى حسم مستقبل الدولار؟ وليه دول كبيرة ومهمة زي تركيا بدأت تطلب الانضمام لبريكس؟
يوم الخميس اللي فات وعلى هامش اجتماعات الجمعية العامة للأمم المتحدة عقد وزارء خارجية الدول الأعضاء فى تجمع بريكس اجتماع مهم جدا لمناقشة اخر التطورات ودراسة بعض المطالب المقدمة قبل الاجتماع السنوى لبريكس واللى هيعقد في روسيا الشهر الجاي.. وطبعا مصر باعتبارها واحدة من أهم أعضاء التجمع شاركت فى الاجتماع ده ومثلها وزير الخارجية بدر عبدالعاطي اللي اتكلم عن التحديات اللي بتواجه دول التجمع الفترة اللي فاتت بما فيها التوترات الجيوسياسية والتهديدات اللي بتواجه السلم والأمن والأزمات الاقتصادية وارتفاع معدلات الديون والتغير المناخي والأزمات في الشرق الأوسط والمنطقة العربية.. وطرح رؤية مصر لدور بريكس
طب ايه تفاصيل الرؤية المصرية للدور اللي ممكن يلعبه بريكس؟
الرؤية المصرية بتتضمن لعب البريكس دور حيوي في إصلاح الهيكل المالي الدولي من خلال ضمان ان القدرات التمويلية للمؤسسات المالية الدولية وبنوك التنمية تكون مناسبة وعادلة وتستجيب لاحتياجات الدول النامية، بالاضافة كمان للتأكيد على ضرورة أن يشمل الإصلاح تعزيز تمثيل الدول النامية في عملية صنع القرار الاقتصادي الدولي… يعنى الدول الصغيرة والأسواق النامية تكون مشاركة فى صناعة القرار
وطلبت مصر من بريكس بشكل عاجل الدعوة لتحسين بنية الديون الدولية بالإضافة لتوفير التمويل اللازم لتحقيق أهداف التنمية المستدامة من خلال المنح والتمويل الميسر، ونقل التكنولوجيا وبناء قدرات البلدان النامية… يعنى ببساطة الدول اللى بتعانى من مشاكل مؤسسات التمويل التابعة لبريكس زي بنك التنمية الجديد وغيره من المؤسسات يمنح الدول دي قروض بشروط بسيطة وتسهيلات فى السداد وكمان بفايدة قليلة مش زي ما بيعمل صندوق النقد الدولى اللى بيحط روط مجحفة حدا.
مصر كمان اتكلمت فى اتفاقيات تبادل العملات المحلية بين الدول الأعضاء فى بريكس خصوصا فى التعاملات التجارية وقالت انها هيكون ليها دور مهم في تعزيز التعاون والتكامل الاقتصادي بالاضافة لتحقيق التنمية المستدامة واكدت ان ده بيفرض ضرورة وضع خارطة طريق واضحة لتحفيز التجارة والاستثمار بين دول التجمع.
طب ايه حكاية الاجتماع المهم اللى هيعقد الشهر الجاي ؟ وايه علاقته بالدولار؟
فى نهاية شهر اكتوبر هيعقد الاجتماع السنوي لتجمع بريكس في مدينة كازان الروسية ومن المتوقع أن تشارك وفود من 126 دولة في الاجتماع وهيضم التجمع كمان ممثلين عن 89 منطقة في روسيا وهيناقش أكتر من 5 آلاف مشارك من 500 مدينة حول العالم القضايا الحالية المتعلقة بالاقتصاد والتقنيات الرقمية والبيئة والبنية التحتية المدنية والنقل والرعاية الصحية والتعليم والثقافة.
لكن اهم موضوع هيتم طرحه للنقاش هو بحث آليات استحداث عملة عالمية جديدة تكون بديل للدولار فى التعاملات التجارة او فى حجم الاحتياطي النقدي بالبنوك المركزية او على اقل تقدير استحداث عملة موحدة لدول بريكس على غرار عملة اوروبا اليورو .. ومتوقع صدور العملة دي يكون بمثابة ضربة موجعة للدولار وهيشجع دول كتير على التخلي عن العملة المريكية
0 تعليق