من حوالى أقل من شهرين بس لو سألت اى حد في مصر عن وزير التربية والتعليم الجديد محمد عبداللطيف كان هيقولك اختيار غير موفق ومش هيقدر يدير ملف التعليم فى مصر.. وفيه كمان اللى كان هيقولك يعنى هي مصر مفيهاش خبراء تعليم يقدروا يديروا الوزارة لما رايحين يجيبوا وزير من المدارس الخاصة.. ويمكن كمان كان ممكن تسمع اللى يقولك خيار فاشل وهيغرق التعليم.. لكن الحقيقة اللي عملوا محمد عبداللطيف من وقت حلف اليمين قدام الرئيس السيسي ولحد دلوقتي يستحق اننا ننظر للراجل نظرة مختلفة شوية ونقيمه بناء على الشغل اللى تم مش من خلال انطباعات مسبقة.. فيا ترى ايه اللى حققوا محمد عبداللطيف فى اقل من شهرين فى الوزارة ؟ وليه بنقول انه واحد من أشجع وزراء الحكومة الجديدة؟ وهل فعلا ممكن يقضي على بعبع الثانوية العامة؟
وزارة التربية والتعليم تقدر تقول عليها وانت مطمن انها مقبرة الوزراات ومفيش وزير بيعمر فيها وده لأنها من الوزارات الخدمية المهمة اللي بتتقاطع مع فئات كبيرة جدا فى المجتمع وتقريبا مفيش بيت فى مصر الا وبيتأثر بقرارات وزيرها وبيدفع فاتورة اى قرار غلط بيتاخد وعشان كده فيه أسماء كبيرة ومهمة خافت رفضت قبول حقيبة التعليم بشكل قاطع وده كان واحد من الأسباب اللى أجلت الاعلان عن التشكيل الوزارى الأخير.. وبعد مفاوضات ونقاشات مطولة تم الاستقرار على محمد عبداللطيف وزيرا للتربية والتعليم.. ومع الاعلان عن اسمه ظهرت حملات تشكيك وهجوم قبل حتى ما يؤدي اليمين اللى يقولك إيه مؤهلاته واللى يقولك يعنى هو عشان حفيد المشير أحمد اسماعيل يمسك وزارة مهمة واللى يقولك ازاى يجيبوا وزير مش معاه دكتوراة ؟!
حملات كتيرة حصلت كانت كفيلة تقضي على أى حد وتكتب نهايته قبل ما يبدأ شغله لكن اللى حصل ان محمد عبداللطيف رما الانتقادات ورا ضهره وبدأ من أول يوم يشتغل على الأرض وواضح من تحركاته وقراراته انه دارس ملف التعليم كويس وعارف مواطن الخلل والأهم عنده رؤية لاصلاح المنظومة .. وده اللى أكده رئيس الحكومة وهو بيرد على المشككين فى اختيار عبداللطيف لما قال انه قابل اكتر من 65 مرشح فى التعديلات الوزارية الأخيرة وكان أهم سؤال للشخصيات اللى قابلها إيه رؤيتهم لملف التعليم وايه الحلول اللى ممكن يقدموها.
وتقدر تقول كده ان محمد عبداللطيف رجل الأقدار الصعبة فى حكومة مدبولى.. شخص ذكي وصبور.. وعنده قوة تحمل، وقدرة على التعامل مع الضغوط وتحويل الانتقادات الى دوافع.. وأى شخص مكانه كان ممكن يعمل زي اللى قبله ويسيب المركب تمشي والدنيا تضرب تقلب ويقف يتفرج.. لكن لأن عبداللطيف شخص مبادر وقيادي واتربى على المواجهة اقتحم عش الدبابير وما سمعش لناس كانت بتخوفوا وتحذروا من دخول جحر التعابين، وخد قرارات ثورية هيون ليها دور مهم فى حل مشكلات كبيرة فى وزارة التربية والتعليم
طب عبداللطيف عمل ايه ؟
وزير التعليم الجديد من أول يوم اقتحم الملفات الشائكة وكانت البداية بملف الثانوية البعبع اللى بيؤرق حياة معظم الأسر المصرية .. ولأن الوزير جاي من تحت وعنده تجربة فى المدارس الخاصة طرحت رؤية مغايرة لتطوير الثانوية العامة نالت اعجاب وترحيبب من مجلس الوزراء.. وأعلن عبداللطيف إعادة تصميم المحتوى العلمي والمعرفي لصفوف المرحلة الثانوية وتوزيعها بشكل متوازن بحيث لا تسبب عبء على الطلاب.
ووفقا للهيكلة الجديدة هيدرس طلاب الصف الأول الثانوي في العام الجديد 6 مواد بدل من 10 مواد وتم إعادة تصميم المناهج المقررة لتصبح اللغة الأجنبية التانية مادة نجاح ورسوب خارج المجموع، وهيطبق منهج العلوم المتكاملة لأول مرة بدلً من منهجي الكيمياء والفيزياء، كمان هيتم إعادة تصميم مادة الجغرافيا لتلغى من الدراسة في الصف الأول الثانوي، وتصبح مادة تخصص للشعبة الأدبية في السنة التالية
فى النهاية اللى عملوا عبداللطيف والتحركات الجريئة فى ايامه الأولى فى الوزارة بتقول انننا قدام عقلية مختلفة.. ووزير قوي الشخصية مش هتننفع معاه حملات التقطيع والتخويف ومش هيتراجع عن تنفيذ أفكاره .. وقادر يواجه ويرد ويقدم حلول خارج الصندوق.. ومكش هيخاف ولا هيجيب ورا .. ومركد هنشوف نتايج مختلفة خلال الشهور الجاية
0 تعليق