يا ترى لو أنت عايز تعمل مشروع صغير ومش عارف تبدأ منين، أو تجيب فلوس تبدأ بيها، تعمل إيه، وايه هي أفضل المشروعات اللي بتحقق ربح وإزاي تشتغل على الفكرة وتطورها وتبقى رجل أعمال في المستقبل.. هنقولك كل التفاصيل في التقرير التالي.
طبعا، في كثير من الشباب عايزين يعملوا مشروع خاص بيهم، لكن بيقف قدامهم عقبة إزاي أموله، وإزاي أقدر أحقق عوائد من المشروع ده في أسرع وقت ممكن.
ومن هنا، نقدر نقولك إن في عدد من الجهات الحكومية بتمول المشروعات الصغيرة والمتوسطة، يعني بتقدم دعم مادي وغير مالي لأصحاب المشروعات دي.
وأول الجهات دي هي جهاز تنمية المشروعات الصغيرة والمتوسطة، واللي بيدعمك في كل مراحل مشروعك، مش بس كده ده بيقدملك البرامج اللي هتزود مهاراتك الفنية والإدارية والقيادية عشان تقدر تدير المشروع كويس، ده بجانب الدعم بالفلوس.
كمان مركز الإبداع التكنولوجي وريادة الأعمال، هيقدم لك كل الدعم المادي والتوجيهي، وبيتيح المركز تقديم الدعم من خلال عدة مراحل، أولها انك "تبني موهبتك" ، والثانية "تدعم فكرتك"، اذوالتالتة "تبدأ شركتك"، وبعد كده بتبجي مرحلة "طور شركتك" ، وأخيرا الوصول إلى مرحلة "شارك المجتمع الإبداع".
كل ده هيساهم في دعمك وبناء شخصيتك كرائد أعمال عشان تقدر تعمل مشروع كويس وتديره كمان بطريقة احترافية، ومش بس كده لأ ده كمان عشان تحقق منه أرباح ويصنف مشروعك ضمن المشروعات الناجحة والتميزة.
ضيف كمان عندك، مبادرة "مٌعدتك شركتك"، ودي عبارة عم مبادرة بتتبناها مبادرة "ابدأ" بهدف تمكين الشباب المصري وتطوير مهاراتهم، وكمان بتيح لحضرتك فرصة التدريب الحصول على رخصة قيادة اللوادر مقدمة من جهاز التدريب الإنتاجي على حرف البناء والمعدات الثقيلة.
يعني ببساطة كده، لو عندك فكرة أو ماعندكش، فالجهات دي ناوية تستثمر في حضرتك، ولو ناوي فعلا تعمل مشروع ماترددش في انك تتوجه لها.
طب لو حضرتك ماعندكش أفكار تقدمها، ماتقلقش يا سيدي، "بانكير" هيقدملك شوية أفكار تختار منها اللي يناسبك عشان تبدأ مشروعك.
أولها، مشروع تنظيم الرحلات، واللي بيعتبر من المشروعات الناجحة، بس لازم كويس تتعلم مهارات التخطيط والتنظيم الدقيق، عشان تقدر تتعاقد مع الشركات السياحة، وتعرف برنامج الرحلات عندهم، وبعد كده تعرضها على العملاء، ومن هنا تبدأ البيزنس بتاعك.
كمان، حضرتك ممكن تروج لشغلك ده عن طريق مواقع التواصل الاجتماعي، لأن في شباب كتير بتدور عليها على رحلات سياحية وترفيهية بشكل دائم ومستمر.
ضيف عندك، مشروع محل حلويات، من أفضل المشروعات الناجحة، بس بشرط إن يكون عندك خبرة ومهارة في صنع الحلويات، أو إنك تجيب شيف حلويات يعمل الشغل وأنت تدير المشروع.
تالت حاجة، محل بقالة صغير، وده سهل جدا وبيعمله أغلب المبتدئين، عشان بيحتاج رأس مال صغير، والخسارة فيه مش كبيرة.
عندك كمان المشاريع الترفيهية الصغيرة، زي البلايستيشن أو طاولة البلياردو أو البينج بونج أو صالة لعب الأطفال، ودي كمان مناسبة للشباب المبتدئين، لأن تكلفتها بسيطة وأرباحه كويسة.
التسويق الإلكتروني كمان من أهم المشروعات دلوقتي، ودخله حلو جدا، يعني ممكن تستخدم الفيس بوك في التسويق لمنتجات البرفانات والملابس والأكل والمفروشات وغيرها.
مشروع المأكولات المنزلية، وده مشروع ستات البيوت، وناجح جدا مابيخسرش، وهو عبارة عن طبخ وجبات وحلويات في البيت، وبيعها للعملاء.
في الحقيقة المشروعات كتيرة والأفكار أكتر، بس المهم إنك تنوي وتقرر تبدأ.
0 تعليق