في حوار تلفزيوني مثير للجدل كشف “محمد عبد الوهاب” عضو مجلس إدارة النادي الأهلي السابق عن سعيه خلال فترة عمله بالنادي الأهلي إلي “تفكيك” نادي الزمالك عن طريق إغراء نجومه بعروض احترافية في ذلك الوقت بالإضافة إلي عمل ما أسماه “الكباري” من أجل التعاقد مع نجوم الزمالك مستشهدا بأسماء ومواقف قام بها حيال هذا الأمر.
أي لاعب كان “بيعكنن” على الأهلي كنا بنمشيه من الدوري خالص
وخلال حديثه مع الإعلامي مهيب عبد الهادي في برنامج “اللعيب” علي قناة MBC مصر كشف محمد عبد الوهاب عن الدور الذي كان يلعبه في مجلس إدارة النادي الأهلي قائلا “أن أي لاعب كان النادي الأهلي يريد التعاقد معاه و فريقه متمسك به كنت بعمله “كوبري” وبعدين يرجع على الأهلي” وواصل حديثه “بأن أي لاعب كنا نرى أنه ممكن “يعكنن” علي الأهلي وجماهيره ولانستطيع التعاقد معاه، كنت بجيب له عقد إحتراف وامشيه من الدوري خالص”.
احنا جبنا رضا عبد العال من الزمالك وطلعنا أشرف قاسم يحترف في السعودية
وفجر “عبد الوهاب” مفاجأة قائلا “عندما حصل الزمالك علي الدوري في التسعينات مرتين متتاليتين كان مدرب الأهلي وقتها أنور سلامة كتب في تقريره إن فرقة الزمالك قوية جدا و إن الأهلي مش هيعرف ياخد بطولة في وجود اسكواد الزمالك ده، قومنا جايبين رضا عبد العال من الزمالك و جبنا عقد إحتراف لأشرف قاسم في السعودية، وجبنا كمان عقدين لــ إيمانويل أمونيكي، واحد من فولفسبورج الألماني وده كان عن طريقي، وعقد تاني من سبورتنج لشبونة وده كان عن طريق الكابتن مجدي عبد الغني، وفعلا قدرنا نفكك فريق الزمالك وقتها”.
كنا هنوقع مع جمال حمزة وهو متألق في الزمالك عن طريق “كوبري”
وتطرق عضو مجلس إدارة النادي الأهلي السابق لــ “جمال حمزة” لاعب الزمالك السابق حيث قال ” في أول موسم لجمال حمزة مع الزمالك كان متألق، وكنا مش عايزين نسيبه في الزمالك وكنا عايزين نجيبه الأهلي، فجبناله عرض من النمسا وكانت الأمور خلاص هتنتهي و هيمشي وبعد كده نرجعه عن طريق “كوبري” بس الزمالك ساعتها موافقش و باظت فكرة الكوبري”.
اللاعب الكويس اللي كان ممكن يروح الزمالك كنا بنخبيه في الساحل
وواصل “عبد الوهاب” حديثه المثير للجدل قائلا ” إن اللاعب الكويس اللي كان الزمالك يفاوضه ونحس انه هيتعاقد معاه، كنا بنجيبه نخبيه في الساحل و نتعاقد معاه احنا” وضرب مثال بلاعب الإسماعيلي “حسني عبد ربه”.
واختتم تصريحاته قائلا “كنا دايما في مجلس الأهلى نستغرب ليه دايما كل م الزمالك يظهر فيه لاعيب جامد أو يعمل اسكواد قوي يجيله عروض في ثانية ويمشي، مع إن الأهلي اللي بياخد بطولات لعيبته مبيجيلهاش عروض”.